Flutse - Een pèèrdemiddel

Flutse - Een pèèrdemiddel

Een medikament woa dajje subiet van genezen ziet da noemn ze een pèèrdemiddel.  De dokteur zei ton we goan ’t groot geschut gebruken.  Da was de tied voa de antibiotica.

Van in de tied dat de boeren Elexir d’Anvers gaven an ulder pèèrden tegen de kolieken.

Woar is de tied dan de menschen met een vallienge ulder bost insmèrden met Vicks en giengn gon sloapen met bruun papier ip de Vicks.

Sommigte vinten aan gèren een vallienge want da geneesde met een dreupel.  Een grog da was warm woater met alcohol (rum, cognac of whiskey).  Warme melk met zeem en alles uutzweten. 

De visschers gebruukten meeuwenvet vor ulder handen in te smèren tegen de kloven.

Als kiend mosten we alle doagen een soeppelepel levertroan deure zwelgen.  ’t Was voa joen ingewanden uut te broaken. Moa nu zeggen ze da levertroan stief gezoend is en rijk aan Omega 3, 6 en 9.

Pielsjaarolie was wreed in trek (olie van de lever van een pijlstaartrog).  Pielsjaar is nie ’t zelfste dan Pilchards !  Ze gebruukten dadde voa massage. Das zelfs in trek bie de footbaliesten. 

Tegen de koede voeten in ’t bedde droaiden ze een oed verwarmd striekiesder in een dikken handddoek en loagen dad ant voetende.  Loater wast een pulle warm woater.

Ojje zeer had ier of doa ton was een pilletje van dr. De Man een woendermiddel.  Later kocht iedereen Aspirine.  Nu ist Dafalgan of Paracetamol.

Ojje zeer an joen moage had ton een lepeltje Andrews zout in water.

Omme weg giengen met carnaval ton aten weerst een Schotse Scharre.  Je kost ton meer pienten  drienken en met een bitje sjanse aoje gin koater.

Voa ‘t bloed te zuveren makte moeder in ’t voorjoar soepe van tiengels.  Met groensel en een stikstje boelie smakte da stief goed.  Alleene tiengels trekken da was nie zo geestig!

Jatter lange deugd van en ’t jukte dag en nacht.

Mussels eten was kerremesse.  Gin gekochte… getrokken ip ’t hoofd… de grotste aan de vule voart (de Stienker) ant sas van Heist.  Omme gedoan aan met eten een glas melk tegen ’t musselvier.  Men der nooit ziek van gewist.

En vele fruut en groensels eten, gesmoesd in de petatten.  Appels en pèren en groensels volgens de tied van ’t joar.  ’t Was nog gin mode van kiwi’s, appelsienen, mango’s of banan.

Ot een kiend ip de groend viel ton een bitje spusel van moeder.  Grottere gasten kregen tentuurdjot. Bruun roadsel voa de schramn tontsmetten.  En pieken dat da deed !!!