Flutse - Uutgoan en dansen

Flutse - Uutgoan en dansen

Omme wieder weg mochten uut  goan in onze joenge joaren ton mosten wieder thuus zien ip ’t eure dan de joengers nu aanzetten.

Ojje noa je lief thuus gienk ton wierd je gin minute allene geloaten en zat je al een ki allene met je lief in d’ itplatse ton kwam moeder te passe en  ten oenpasse ip bezoek…

Uutgoan da was goan dansen.  Voa den orloge speelden er in vele café’s orkestjes.  En ton wierd er nog gedanst: een polka, een foxtrot, een tango, een java, een walstje, een Westkapelschen (Scottisch)…

Achter den orloge wieren vele orkestjes vervangen deur een juke-box.  Je kost zelve joen muziek kiezen.  Vuuf frank voa drie platjes.

Ojje een oogtje ad ip een schoon meistje ton koos je een troagen, een plakker.  Een danstje vor één tegel en liefst gin te grote tegel.

Der wierd nateurlik uutgekeken nor de Bamba, de kusjesdans.  Da  was van lek mien liptje.  ’t kwielsel liep van onze kinne van de grote goeste.

En achter de Bamba een slow, sexy time.  Koekenbak, succes verzekerd.

Moa ton kwamt er een andere soorte muziek en dansen met twee, een joeng en een meistje, was gin mode nie mè.

De twist, de hukkelbuk… iedereen stoend allene ip de pieste te klutsen en te schudden en maneuvers te verkopen.  Kwestie van indruk te moaken.

Binst dan ze ant bewegen woaren kwamen ze dichter bie mankoar… bille tegen bille, buuk tegen buuk en ot ’t lukte begosten ze nog tegen mankoar te klappen.

Gelukkig wast er van drugs nog gin sproake.  Wel van pienten drienken… zat zien doe gin zeer hé.  En ’s anderendoags ist over.

Vroeger was alles verboden.  Kiekken noa de meistjes dadde mocht allene moa ot kerremesse was.  Een specialletje was de rupse… en zeker ot da zil toe gienk !

De kunste was van ’t meistje te loaten zitten an de binnenkant en de joengen an de butenkant.  En een ki dat da spil begoste te droaien schoof de joengen van ‘tzelfs noa de binnenkant, tegen da meistje.   Moa leute dat da was surtoe ot de meistje da geiren had.   Osse een bitje meegoande was.  Van de sliengers mostenk spugen en van de boksottoos woaren wieder deur mankoar geklutst.  De peirdemeulen en d’ottootjes da was voa de klintjes.  En de reuzels en de maccarongs da was voa de snoeperoars.

’t Woaren schoane tieden ot kerremesse was.  Dadde en carnaval en we wisten van nie beter.